«Ես հետո կդառնամ նախագահ» նյութը հաղթեց ՀԼԱ-ի մրցույթում

Հանրային լրագրության ակումբի «Նախագահական ընտրություններին ընդառաջ» խորագրով թղթակցության մրցույթում հաղթել եւ Canon PowerShot A 800 լուսանկարչական ապարատ է շահել հանրային թղթակից, «Իմ լուրերը» հարթակի ակտիվ թղթակից Լիլիթ Հակոբյանը`  «Ես հետո կդառնամ նախագահ» նյութի համար:

Լիլիթը գրել է նախագահ դառնալու իր մտորումների մասին: Հեղինակն այդ ամբողջ գործընթացը նմանեցնում է շախմատի, ուր բոլոր զինվորներն ուզում են թագավոր դառնալ, բայց քչերն են հասնում այդ սահմանին: 

«Կան զինվորներ, ովքեր այդպես էլ թագավոր չեն դառնում, բայց ողջ կյանքում թագավորի խաղ են խաղում, ու կան թագավորներ, որ զինվորից էլ մանր խաղ են ցույց տալիս: Ես համոզված եմ` լավ է լինել լավ զինվոր, քան` միջակ թագավոր...»,- գրել է հեղինակը:

Ժյուրի անդամները հատկապես ընդգծել էին նյութի հետաքրքիր եւ հստակ կառուցվածքը, թարմությունը եւ այն, որ այսպես կոչված «ծեծված» թեմաներին անդրադարձ չկար: 

ՀԼԱ-ն մրցանակը Լիլիթին կհանձնի փետրվարի 6-ին, ՀԼԱ գրասենյակում:

Նշենք, որ մրցույթին դիմել էին 15 հանրային թղթակիցներ` 15 թղթակցություններով:

Ժյուրիի կազմում էին «Ինտերնյուս» ՀԿ-ի ներկայացուցիչ Գեղամ Վարդանյանը, «Քաղաքացիական Ֆորում» ՀԿ-ի նախագահ Մարինե Մանուչարյանը, «Մաքուր պահենք մեր քաղաքը» նախաձեռնության ակտիվիստ, քաղաքագետ Արթուր Ավթանդիլյանը եւ ՀԼԱ «Քաղաքացիական լրագրություն Ֆեյսբուք ցանցի և բջջային հեռախոսների միջոցով դեպի My News հարթակ» նախագծի շրջանակներում, ծրագրերի պատասխանատու Սառա Խոջոյանը:

Մրցույթի նպատակն էր խթանել  Հայաստանում բնակվող երիտասարդների, ակտիվ քաղաքացիների ու հանրային թղթակիցների` ընտրությունների թեմայով ինքնարտահայտումը հանրային թղթակցությունների, բլոգային գրառումների եւ նոթագրությունների միջոցով: 

Մրցույթը հայտարարվել էր ՀԼԱ-ի`«Քաղաքացիական լրագրություն Ֆեյսբուք ցանցի և բջջային հեռախոսների միջոցով դեպի My News հարթակ» նախագծի շրջանակներում, որն իրականացվել է «Լրատվության այլընտրանքային ռեսուրսներ» ծրագրով Եվրասիա համագործակցության հիմնադրամի տրամադրած դրամաշնորհի միջոցով:

Print Friendly and PDF