Ապրիլի 13-ին, ժամը 14:00-ին, Մեդիա կենտրոնում կանցկացվի քննարկում՝ «Հրատապ փոփոխություններ Ընտրական օրենսգրքում. երաշխավորվու՞մ են արդար ու թափանցիկ ընտրություններ» թեմայով։
Բանախոս՝
- Վարդինե Գրիգորյան, Հելսինկյան քաղաքացիական ասամբլեայի Վանաձորի գրասենյակ-ի ծրագրերի ղեկավար։
2026թ․ ապրիլի 6-ին ԱԺ «Քաղաքացիական պայմանագիր» խմբակցության պատգամավորները ներկայացրել են Ընտրական օրենսգրքում փոփոխությունների նախագիծ։ Այն անդրադառնում է 2024 թ. դեկտեմբերի 5-ին ընդունված փոփոխություններից առաջացած խնդիրներին, որոնք բացահայտվել էին միայն Աժ հերթական ընտրությունների նշանակումից հետո։
Մի խնդիրը վերաբերում էր քվեաթերթիկի անվավերության հիմքերին. ծրարում այլ իրի առկայությամբ ծրարը մարելու և քվեաթերթիկը անվավեր համարելու հիմքը հանվել էր։
Մյուս խնդիրը՝ հանվել էր Աժ ընտրություններին մասնակցող դաշինքի անվանման սահմանափակումների մասին դրույթը, թողնելով համանման կարգավորումը Ընտրական օրենսգրքի՝ տեղական ինքնակառավարման մարմինների ընտրությունների վերաբերյալ կարգավորումներում և Կուսակցությունների մասին օրենքում՝ կուսակցությունների անվանումների հետ կապված։
Քննարկման ընթացքում կանդրադառնանք նրան, թե նախագծում ներկայացված փոփոխություններն ի՞նչ ազդեցություն կարող են ունենալ ընտրությունների ազատության և ընտրողի անձի գաղտնիության վրա, և ինչու՞ են մտահոգ «Անկախ դիտորդ» դաշինքը ներկայացնող կազմակերպությունները:
Քննարկումը հեռարձակվելու է առցանց՝ Մեդիա կենտրոնի յություբյան ու ֆեյսբուքյան հարթակներում։
Լրագրողների մուտքն ազատ է։
Հարցերը հնարավոր է ուղարկել նաև առցանց՝ գրելով Մեդիա կենտրոնի ֆեյսբուքյան էջին։
Քննարկումն ացկացվում է «Մեդիա կենտրոն. քաղաքացիական հասարակության արագ արձագանք արդար ընտրությունների համար» ծրագրի շրջանակում։
Ծրագիրն իրականացվում է Ժողովրդավարության զարգացման հիմնադրամի աջակցությամբ՝ որպես «Գործընկերություն հանուն ժողովրդավարության» նախաձեռնության մաս։
Բովանդակության համար պատասխանատվություն է կրում Հանրային լրագրության ակումբը, և պարտադիր չէ, որ այն արտահայտի Ժողովրդավարության զարգացման հիմնադրամի տեսակետները։
