Հանրային լրագրության ակումբի նախաձեռնությամբ գործող Մեդիա կենտրոնն արդեն տասներկու տարի է (2013 թ․-ից), ինչ համարվում է բացառիկ հանրային հարթակ՝ քաղաքացիական հասարակության, փորձագիտական համայնքի և որոշում կայացնողների միջև բաց երկխոսության և բազմակարծիք քննարկումների համար։
Մեդիա կենտրոնն աջակցել է ՀԿ-ներին, մարդու իրավունքների պաշտպանությամբ զբաղվող մասնագետներին ու ակտիվիստներին՝ խթանելով նրանց վերահսկողական դերը, հաղորդակցությունն ու ջատագովությունը։
Մեդիա կենտրոնը միակ հարթակն է Հայաստանում,
- որտեղ քաղաքացիական հասարակությունը կարող է անվճար բարձրաձայնել իր առաջարկներն ու մտահոգությունները՝ անցկացնելով ասուլիսներ, կամ մասնակցելով քննարկումների ու բանավեճերի։
- որն անմիջապես արձագանքում է մարդու իրավունքների խախտումներին, կամ լուսաբանում հասարակության ուշադրությունից դուրս մնացած խնդիրները,
- որտեղ քաղաքացիական հասարակության ներկայացուցիչները ներկայացնում են ժողովրդավարական բարեփոխումների համար անհրաժեշտ գործողությունները, ձևակերպում ակնկալիքներն ու պահանջները, քննարկում առաջարկները, ընթացիկ բարեփոխումների խոցելի և խնդրահարույց կետերը։
Արդեն ավելի քան մեկ տասնամյակ Մեդիա կենտրոնը կազմակերպել է հազարավոր բանավեճեր, մամուլի ասուլիսներ, հարցազրույցներ, հեղինակել մի շարք վավերագրական ֆիլմեր ու անցկացրել դրանց ցուցադրություն-քննարկումներ՝ արձագանքելով ինչպես ներհայաստանյան, այնպես էլ տարածաշրջանային զարգացումներին։
- Մեդիա կենտրոնը կայուն գործող հարթակ է, որը մշտապես բաց է եղել ժողովրդավարություն ջատագովող քաղհասարակության համար՝ անկախ թեմայից կամ քաղաքական փուլից։
- Բարեփոխումների (այդ թվում՝ ՀԸԳՀ/CEPA համաձայնագրի) վերաբերյալ քննարկումները ՄԿ-ում եղել են քաղհասարակության դիրքորոշումները հանրայնացնելու կարևոր միջավայր։
- Վավերագրական ֆիլմերի արտադրությունը հնարավորություն է տվել հասարակական կարևոր հարցերը ներկայացնել մարդկային պատմությունների միջոցով և փաստարկված՝ կրկին խթանելով ու ներառելով քաղհասարակության առաջարկներն ու ուղերձները։
- ՄԿ միջոցառումները դարձել են տասնյակ հազարավոր մեդիա նյութերի, հոդվածների, ռեպորտաժների հիմք՝ բազմապատկելով մեր ազդեցության շրջանակը։
Մեր առաքելությունն է․
- Խթանել քաղհասարակության ներկայությունը տեղեկատվական դաշտում,
- Աջակցել հանրային բանավեճի մշակույթի կայացմանը,
- Հանդես գալ որպես քաղաքացիական վերահսկողության, փաստերի վերլուծության և առաջարկների հնչեցման հարթակ,
- Նպաստել հասարակության իրազեկվածությանը և որոշում կայացնողների հաշվետվողականությանը,
- Ընդլայնել հասանելիությունը ժողովրդավարության վերաբերյալ հանրային գիտելիքին։
Մեդիա կենտրոնն անհրաժեշտ ռեսուրսների առկայության պարագայում կշարունակի ծառայել որպես տեղեկատվության, մասնակցության և ժողովրդավարության կենտրոն, որտեղ հնչում են տարբեր ձայներ՝ ի նպաստ փոփոխության, ներգրավվածության ու թափանցիկության։
Ներկայացնում ենք Մեդիա կենտրոնի 2013-2025 թթ․ գործունեությունը՝ թվերով։
