Սույն թվականի մարտի 6-ին, ժամը 12:00-ին, Մեդիա կենտրոնում տեղի կունենա քննարկում «Կտրել գլուխը՝ գլխացավից ազատվելու համար. ի՞նչ է սպառնում Հայաստանից արտահանձնված օտարերկրյա քաղաքացիներին իրենց երկրներում» խորագրով։ 

Բանախոս

• Արսեն Սարդարյան, փաստաբան, ՀՀ փաստաբանների պալատի անդամ, կառավարող գործընկեր,
• Արթուր Սաքունց, «Հելսինկյան քաղաքացիական ասամբլեայի Վանաձորի գրասենյակ»-ի ղեկավար, իրավապաշտպան։

Քննարկումը հեռարձակվելու է առցանց՝ Մեդիա կենտրոնի յություբյան ու ֆեյսբուքյան հարթակներում։ 

Լրագրողների մուտքն ազատ է։ 

Հարցերը հնարավոր է ուղարկել նաև առցանց՝ գրելով Մեդիա կենտրոնի ֆեյսբուքյան էջին։

ՀՀ-ում օտարերկրյա բազմաթիվ քաղաքացիներ կան, որոնք Հայաստանում են իրենց երկրում քաղաքական հայացքներով կամ համոզմունքներով պայմանավորված հետապնդումների պատճառով: 

Իրենց քաղաքացիության կամ բնակության երկրներում այս քաղաքացիների հանդեպ քաղաքական նպատակներով հարուցված են քրեական գործեր: Կա իրական վտանգ և սպառնալիք,  որ իրենց պետություն ետ վերադառնալու դեպքում նրանք կենթարկվեն ֆիզիկական և հոգեբանական բռնությունների, անմարդկային և մարդկային արժանապատվությունը նվաստացնող պատժի կամ վերաբերմունքի, խոշտանգումների կամ արտադատական մահապատժի: 

Հելսինկյան քաղաքացիական ասամբլեայի Վանաձորի գրասենյակի վարույթում, ի թիվս այլ գործերի, կան  նաև Ռուսաստանի Դաշնության կողմից քաղաքական հետապնդման հիմքով քրեական հետապնդման ենթարկվող երեք ՌԴ քաղաքացիների՝ Վլադիմիր Ուխալովի, Պավել Դանիլովի և Դմիտրի Շիգաևի գործերը: Այս քաղաքացիները ՀՀ կողմից ՌԴ-ին արտահանձնվելու վտանգի առջև են։  

Մեդիա կենտրոնը դիմեց Արդարադատության նախարարությանը, Մարդու իրավունքների պաշտպանի գրասենյակին՝ այս թեմայով քննարկմանը մասնակցելու առաջարկով, սակայն երկու դեպքում էլ ստացավ մերժում։

Արտահանձնումը թույլատրելով՝ ՀՀ-ն ուղղակիորեն կխախտի մարդու իրավունքների պաշտպանության ոլորտում ստանձնած միջազգային պարտավորությունները, մասնավորապես Մարդու իրավունքների և հիմնարար ազատությունների եվրոպական կոնվենցիայի 2-րդ և 3-րդ հոդվածներով  ստանձնած պարտավորությունները։ 

Արտահանձնումը թույլատրելով՝ ՀՀ-ն ուղղակիորեն կխախտի մարդու իրավունքների պաշտպանության ոլորտում ստանձնած միջազգային պարտավորությունները, մասնավորապես Մարդու իրավունքների և հիմնարար ազատությունների եվրոպական կոնվենցիայի 2-րդ և 3-րդ հոդվածներով ստանձնած պարտավորությունները։

Քննարկումն ացկացվում է «Մեդիա կենտրոն. քաղաքացիական հասարակության արագ արձագանք արդար ընտրությունների համար» ծրագրի շրջանակում։ Ծրագիրն իրականացվում է Ժողովրդավարության զարգացման հիմնադրամի աջակցությամբ՝ որպես «Գործընկերություն հանուն ժողովրդավարության»նախաձեռնության մաս։

Բովանդակության համար պատասխանատվություն է կրում Հանրային լրագրության ակումբը, և պարտադիր չէ, որ այն արտահայտի Ժողովրդավարության զարգացման հիմնադրամի տեսակետները։