Ապրիլի 17-ին, ժամը 12:00-ին, Մեդիա կենտրոնում կանցկացվի քննարկում՝ «ՀՀ նոր սահմանադրություն. անհրաժեշտությու՞ն, թե՞ քաղաքական նպատակահարմարություն» թեմայով։
Բանախոս՝
- Արթուր Սաքունց, Հելսինկյան քաղաքացիական ասամբլեայի Վանաձոր-ի գրասենյակի ղեկավար, սահմանադրական բարեփոխումների հանձնաժողովի անդամ:
ՀՀ վարչապետ Նիկոլ Փաշինյանը առաջարկում է «Իրական Հայաստանի» գաղափարախոսության հիմքում դնել նաև ՀՀ նոր սահմանադրությունը. «Էական է համաժողովրդական հանրաքվեով նոր Սահմանադրության ընդունումը, քանի որ գործող Սահմանադրության ընդունման հանրաքվեները հանրային ընկալման մեջ ունեն լեգիտիմության պակաս։ Նոր Սահմանադրության ռազմավարական նպատակն է անցումը պետականազուրկ ազգի մնացորդային գործելակերպից դեպի պետականակերտ ժողովրդի գործելակերպ»։
«Նոր Սահմանադրության նախագծի տեքստն արդեն պատրաստ է և առաջիկայում կքննարկվի «Քաղաքացիական պայմանագիր» կուսակցության վարչության նիստում և Ազգային ժողովի խմբակցությունում»,- հայտարարել է ՀՀ արդարադատության նախարար Սրբուհի Գալյանը Արդարադատության նախարարին կից հասարակական խորհրդի առաջին նիստում։
- Ի՞նչ առաջնահերթություններ հաշվի առնելով է ձևավորվել նախագծի հայեցակարգը,
- «Կոնֆլիկտային» գնահատված Անկախության հռչակագիրը՝ Սահմանադրությունից դու՞րս,
- «Հայրենիքը պետությունն է» մոտեցման քաղաքական և իրավական հետևանքները,
- Սահմանադրական կարգի լեգիտիմության խնդիրը և նոր հանրաքվեի նշանակությունը,
- Իշխանության ճյուղերի ապակենտրոնացման և հավասարակշռության ապահովման առաջարկվող մեխանիզմները,
- Խորհրդարանական կառավարման մոդելի պահպանման և զարգացման հեռանկարները,
- Հանրային մասնակցության դերը սահմանադրական բարեփոխումների գործընթացում,
- Սահմանադրական բարեփոխումների տարածաշրջանային և քաղաքական համատեքստը:
Այս և թեմային առնչվող այլ հարցեր կհնչեն քննարկման ընթացքում:
Քննարկումը հեռարձակվելու է առցանց՝ Մեդիա կենտրոնի յություբյան ու ֆեյսբուքյան հարթակներում։
Լրագրողների մուտքն ազատ է։
Հարցերը հնարավոր է ուղարկել նաև առցանց՝ գրելով Մեդիա կենտրոնի ֆեյսբուքյան էջին։
Քննարկումն ացկացվում է «Մեդիա կենտրոն. քաղաքացիական հասարակության արագ արձագանք արդար ընտրությունների համար» ծրագրի շրջանակում։
Ծրագիրն իրականացվում է Ժողովրդավարության զարգացման հիմնադրամի աջակցությամբ՝ որպես «Գործընկերություն հանուն ժողովրդավարության» նախաձեռնության մաս։
Բովանդակության համար պատասխանատվություն է կրում Հանրային լրագրության ակումբը, և պարտադիր չէ, որ այն արտահայտի Ժողովրդավարության զարգացման հիմնադրամի տեսակետները։
