Բժշկական օգնությունը քրեակատարողական հիմնարկներում. քննարկում

Հանրային լրագրության ակումբի Մեդիա կենտրոնում տեղի ունեցավ քննարկում՝ նվիրված քրեակատարողական հիմնարկներում բժշկական օգնության կազմակերպմանը։

Քննարկումն անցկացվեց Եվրոպական միության ֆինանսական աջակցությամբ ընթացող «Հայաստանում արդարադատության ոլորտի բարեփոխումների մշտադիտարկում»  (www.juremonia.am) ծրագրի «Մեդիան հանուն բարեփոխումների. հանրային երկխոսության խթանում քրեակատարողական և պրոբացիոն համակարգերի վերաբերյալ» ենթադրամաշնորհի շրջանակում: Ենթադրամաշնորհ իրականացնող կառույցը «Հանրային լրագրության ակումբ» ՀԿ-ն է:

Բանախոսներ էին՝ ՀՀ առողջապահության նախարարության «Քրեակատարողական բժշկության կենտրոն» ՊՈԱԿ-ի Բժշկական օգնության կազմակերպման բաժնի պետ Նաիրա Բաբայանը և ՀՀ արդարադատության նախարարության Քրեակատարողական հիմնարկներում և մարմիններում հասարակական վերահսկողություն իրականացնող հասարակական դիտորդների խմբի անդամ Անահիտ Մկրտչյանը։

Քննարկման ընթացքում անդրադարձ կատարվեց քրեակատարողական բժշկության կառավարման փոփոխություններին, բուժսպասարկման որակին, ֆինանսավորման խնդիրներին և դատապարտյալների՝ քաղաքացիական հիվանդանոցներ տեղափոխվելու հարցին։

Ընդգծվեց, որ ՀՀ ԱՆ քրեակատարողական հիմնարկների և առողջապահության նախարարության ստորաբաժանումների համագործակցությունը դեռևս հղկման կարիք ունի։

«Այս ամենը կապված է նաև առողջապահության նախարարության ֆինանսական միջոցների առկայության հետ… Մի շարք հարցերում մինչ օրս փոխկապակցած համագործակցում են ՊՈԱԿ-ի ստորաբաժանումները և ՔԿՀ-ները, այս համագործակցությունը նոր է և դեռևս հղկման կարիք ունի, այդ թվում՝ ուղեկցումների, միմյանցից տեղեկացված լինելու մասով»,– ընդգծեց Անահիտ Մկրտչյանը։ Նա նաև նշեց, որ անկախ ֆինանսավորումից՝ դատապարտյալների և բուժանձնակազմի միջև դեռևս ամուր վստահության կամուրջ չկա. «Գուցե պատճառը մի փոքր սուբյեկտիվ է դատապարտյալների կողմից, քանի որ բոլորն էլ նախընտրում են օր առաջ տեղափոխվել իրենց ցանկացած քաղաքացիական հիվանդանոց: Մեծ մասի դժգոհությունը կապված է դատապարտյալների հիվանդանոց տեղափոխվելու ցանկության հետ, որովհետև ՔԿՀ-ում միայն առաջնային օգնություն է տրամադրվում…»։

——————————

Լրացուցիչ հարցերի համար կարող եք կապ հաստատել մեզ հետ՝

Հեռ․՝ +374 99 755 898

Էլ․ փոստի հասցե՝ [email protected] | [email protected]

Քննարկումն անցկացվել է Եվրոպական միության ֆինանսական աջակցությամբ ընթացող «Հայաստանում արդարադատության ոլորտի բարեփոխումների մշտադիտարկում»  (www.juremonia.am) ծրագրի շրջանակում: Բովանդակության համար պատասխանատվություն է կրում Հանրային լրագրության ակումբը, և պարտադիր չէ, որ այն արտահայտի Եվրոպական միության տեսակետները:

Քննարկման ամբողջական տեսագրությունը հասանելի է այստեղ։ ⬇️