Հանրային լրագրության ակումբը (ՀԼԱ) Հայաստանում գրանցված հասարակական կազմակերպություն է, որը ստեղծվել է 2011 թվականի մարտին։

ՀԼԱ-ի առաքելությունն է նպաստել մարդու իրավունքների, հիմնարար ազատությունների, խոսքի ազատության, բազմակարծության պաշտպանությանը, աջակցել ժողովրդավարական գործընթացների և քաղաքացիական հասարակության ամրապնդմանը՝ նորարար մեդիա նախաձեռնությունների, հանրային երկխոսության և համագործակցային հարթակների միջոցով։

ՀԼԱ-ն ակտիվ դերակատար է նաև տարածաշրջանային խաղաղության և փոխըմբռնման գործընթացներում՝ իր ծրագրերում ներգրավելով տարբեր խմբերի, համայնքների և հասարակության լայն շերտերի ներկայացուցիչների։

Մեր գործունեության առանցքային ուղղություններն են՝

• Մեդիագրագիտությամբ զինված իրազեկ հասարակության ձևավորում՝ կրթական ծրագրերի, մեդիագրագիտության դասընթացների, ուսումնական նյութերի և մեդիա բովանդակության ստեղծման միջոցով։
• Ապատեղեկատվության դեմ պայքար և տեղեկատվական դիմակայունության ամրապնդում՝ մեդիա դաշտի հզորացում, փաստերի ստուգում, հանրային իրազեկում։
• Խաղաղության ու երկխոսության խթանում՝ խտրականության, ատելության խոսքի և քարոզչության դեմ ուղղված նախաձեռնություններով։
• Լրագրողական կարողությունների զարգացում՝ լրագրողների, մեդիա աշխատողների և քաղաքացիական ակտիվիստների հմտությունների բարձրացմանն ուղղված ծրագրերի միջոցով։
• Աջակցություն Լեռնային Ղարաբաղից բռնի տեղահանված լրագրողներին և մեդիա աշխատողներին։
• Քաղաքացիական մասնակցության խթանում և ժողովրդավարական վերահսկողության ուժեղացում՝ քաղաքացիների և քաղհասարակության կազմակերպությունների մասնակցության լայն հնարավորությունների ստեղծում, մասնավորապես՝ արդարադատության, ընտրական գործընթացների և բարեվարք կառավարման ոլորտներում։
• Փակ հաստատություններում մարդու իրավունքների պաշտպանություն՝ լուսաբանման, իրազեկման, հանրային վերահսկողության և քաղաքական բարեփոխումների խթանման միջոցով։

ՀԼԱ-ն իր առաքելությունն իրականացնում է նաև Մեդիա կենտրոնի գործունեության միջոցով, որը 2013 թվականից ի վեր դարձել է Հայաստանում քաղհասարակության անդավաճան աջակիցը, մեդիայի միջոցով ջատագովություն իրականացնելու հարցում, որը շարունակում է մնալ հանրային քննարկումների, բանավեճերի և պետական-քաղաքացիական երկխոսության եզակի հարթակներից մեկը։

Վերջին տարիներին ՀԼԱ-ն նաև ինտեգրում է ոչ բռնի հաղորդակցության (NVC) սկզբունքները իր ծրագրերում՝ որպես խաղաղաշինության և հասարակական երկխոսության նորարար մեթոդ։ Մենք ձգտում ենք խթանել փոխադարձ հարգանքի, կարեկցանքի և կառուցողական լսելու մշակույթ՝ հատկապես բարդ, հակամարտությամբ ծանրաբեռնված և բևեռացված հասարակական դիսկուրսներում՝ նպաստելով հանրային բանավեճի ավելի ներառական և խաղաղ զարգացմանը։

Մեր աշխատանքում մշտապես ձգտում ենք նորարարությանը, համագործակցությանը և բարձր մասնագիտական որակին, նպաստելով այնպիսի մշակույթի ձևավորմանը, որտեղ հստակ, ստուգված և հավասարակշռված տեղեկատվությունը ծառայում է հանրային շահին և աջակցում է ժողովրդավարության ամրապնդմանը։