Ռազմավարական հաղորդակցության դասընթացի հայտարարություն

 Հանրային լրագրության ակումբը հրավիրում է մասնակցելու ռազմավարական հաղորդակցության դասընթացի, որը տեղի կունենա ապրիլի 17-ին և 18-ին՝ Երևանում (ամսաթվերը նախնական են)։

Դասընթացն անցկացնելու է ռազմավարական հաղորդակցության փորձագետ Հայկ Աբրահամյանը՝ հրավիրյալ այլ բանախոսների հետ համատեղ։

Դասընթացին կարող են դիմել Երևանում և ՀՀ մարզերում գործունեություն իրականացնող հասարակական կազմակերպությունների հաղորդակցությամբ և ծրագրային կառավարմամբ զբաղվող աշխատակիցներ։ Դասընթացին կարող են դիմել նաև  ՀԿ-ներին առնչվող մեդիա հարթակների ներկայացուցիչներ։

Հանրային լրագրության ակումբը կհոգա մարզերից ժամանող մասնակիցների ճանապարհի, կեցության և սննդի ծախսերը։

Դասընթացը նվիրված է լինելու դատաիրավական բարեփոխումների ոլորտում հանրային տեղեկատվական և իրազեկման արշավների պլանավորմանն ու իրականացմանը։

Դասընթացի մասնակիցները հնարավորություն կունենան ներկայացնելու Հայաստանի դատաիրավական համակարգի բարեփոխումներին նվիրված հանրային արշավի նախագիծ։ Հաղթող կճանաչվի մեկ նախագիծ՝ ստանալով 600,000 ՀՀ դրամ (հարկերը ներառյալ) ֆինանսական աջակցություն այն իրականացնելու համար։

Դասընթացին դիմելու համար անհրաժեշտ է լրացնել այս առցանց հայտը մինչև մարտի 31-ը ներառյալ։  Դասընթացին մասնակցելու համար ընտրվելու է 10 դիմորդ։

Կդիտարկվեն միայն այն հայտերը, որոնցում դիմորդները կներկայացնեն հանրային տեղեկատվական և իրազեկման արշավի նախագիծ` դատաիրավական բարեփոխումների շրջանակում մեկ հստակ խնդրի կամ թեմայի շուրջ։

Առաջարկվող արշավը պետք է նպատակ ունենա հանրությանը մատչելի և հասկանալի ձևաչափով ներկայացնել դատաիրավական բարեփոխումներին առնչվող  փոփոխությունների ընթացքը, առկա մարտահրավերները և դրանց հաղթահարման ուղիները։ Այն կարող է ներառել տեղեկատվական նյութերի ստեղծում, մեդիա համագործակցություն, հանրային քննարկումներ և այլ մեթոդներ՝ խթանելով հանրային տեղեկացվածությունը և մասնակցությունը, նպաստելով նաև բարեփոխումների վերաբերյալ հասարակական պահանջի ձևավորմանը։

Դիմորդներից ակնկալվում է ներկայացնել արշավի համառոտ հայեցակարգը՝ ներառյալ դրա նպատակները, հիմնական ուղերձները, թիրախային լսարանը, գործիքակազմը և իրականացման մոտեցումները՝ առավելագույնը մեկ էջի սահմաններում։

Դասընթացն անցկացվում է «Արդարացի դատաիրավական բարեփոխումներ» ծրագրի շրջանակում, որն իրականացվում է Ժողովրդավարության զարգացման հիմնադրամի  առաջնորդությամբ ձևավորված Կոնսորցիումի կողմից, որի անդամներն են՝ Հանրային լրագրության ակումբը, Հելսինկյան քաղաքացիական ասամբլեայի Վանաձորի գրասենյակը և «Իրավունքների պաշտպանություն առանց սահմանների» ՀԿ-ն։

Հիշեցնենք, որ ծրագրի շրջանակում դասընթացներ են անցել Ռազմավարական հաղորդակցության լաբի 3 հոսքի մասնակիցներ։