Հայտարարություններ

Հանրային լրագրության ակումբը (ՀԼԱ) հայտարարում է «Ռազմավարական հաղորդակցության լաբորատորիա» կրթական ծրագրի երկրորդ փուլի ընդունելություն։ Վերապատրաստման ծրագիրը ներառում է կարողությունների զարգացման դասընթացներ և անհատական նախագծերի վրա աշխատելու հնարավորություն։

Լաբորատորիայի շրջանակում բացառիկ և անվճար դասընթացը տևելու է երեք օր։

Դասընթացն անց են կացնելու ռազմավարական հաղորդակցության ոլորտի միջազգային և հայաստանյան հեղինակավոր մասնագետներ։

Ովքե՞ր կարող են դիմել

Դասընթացին կարող են դիմել Երևանում և ՀՀ մարզերում գրանցված և գործունեություն իրականացնող հասարակական կազմակերպությունների, հիմնադրամների և շահույթ չհետապնդող/ոչ կառավարական այլ կազմակերպությունների հաղորդակցությամբ, հանրային կապերով և ծրագրային կառավարմամբ զբաղվող ներկայացուցիչներ, ինչպես նաև Լրագրության, Հաղորդակցության, Հանրային կապերի ֆակուլտետների մագիստրատուրայում սովորող ուսանողներ։

Դիմորդներից միայն 12-ն են հնարավորություն ունենալու մասնակցելու դասընթացին։

Արդյունքում լավագույն շրջանավարտները հնարավորություն կունենան իրականացնել անհատական  նախագծեր՝ ներկայացնելով իրենց կազմակերպությունների կամ  որևէ ծրագրի հաղորդակցության ռազմավարություն և գործողությունների պլան՝ ստանալով դրամաշնորհներ։

 

Դասընթացի թեմաները․

1․ Ռազմավարական հաղորդակցության ներածություն․ քայլ առ քայլ ուսուցում

• Կազմակերպության/ծրագրերի նպատակների սահմանում
• Թիրախային լսարանի ընտրություն և ուսումնասիրություն
• Հաղորդակցության նպատակների սահմանում
• Ուղերձների ձևակերպում
• Հաղորդակցության գործիքների և ալիքների ընտրություն
• Հաղորդակցության գնահատման ցուցիչների սահմանում
• Հաղորդակցության գործողությունների պլանի մշակում

2․ Ռազմավարական հաղորդակցության գործիքներ (Պատմույթների ներկայացում, Սոցիալական մեդիա ռազմավարություն, Ռեակտիվ/արձագանքող սոցիալական մեդիա, Լսարանի ձևավորում և ներգրավում և այլն)

3․ Պանելային քննարկում հայաստանյան ՔՀԿ-ների Հաղորդակցության մասնագետների մասնակցությամբ՝ քննարկելու ռազմավարական հաղորդակցության ոլորտում իրենց լավագույն փորձն ու ձեռքբերումները

Ժամկետներ

Առաջին դասընթացն անցկացվելու է Աղվերանում՝ սեպտեմբերի 24-26-ին։ 

Սեպտեմբերի 27-ից հոկտեմբերի 10-ն ընկած ժամանակահատվածում պետք է մշակվեն և ներկայացվեն անհատական նախագծերը։

Հոկտեմբերի 16-ին Երևանում տեղի կունենա մեկօրյա սեմինար՝ անհատական նախագծերի իրականացման վերաբերյալ խորհրդատվություն ստանալու, գործողությունների պլանը և դրանց իրականացման տեխնիկական ու բովանդակային առանձնահատկությունները քննարկելու նպատակով։

Հոկտեմբերի 20-ից դեկտեմբերի 20-ը ընկած ժամանակահատվածում պետք է իրականացվեն անհատական նախագծերը, ներկայացվեն ամփոփիչ հաշվետվությունները։ Դրանց իրականացման համար մասնակիցները կստանան դրամաշնորհներ։

Դասընթացին դիմելու կարգը

Հետաքրքրված անձինք պետք է լրացնեն դասընթացին մասնակցելու առցանց հայտը։

Դիմելու վերջնաժամկետը սեպտեմբերի 10-ն է։ Դասընթացի հետ կապված հարցերի դեպքում կարող եք կապ հաստատել ՀԼԱ Ծրագրերի ղեկավար Ալեքսանդր Մարտիրոսյանի հետ՝  [email protected] էլ․ փոստի միջոցով։ Նամակի թեմա դաշտում հարկավոր է նշել՝ «StratComm. Lab_Q&A»:

Դասընթացի աշխատանքային լեզուն անգլերենն ու հայերենն է՝ համաժամանակյա  թարգմանությամբ։ ՀԼԱ-ն կապահովի բոլոր մասնակիցների ճանապարհի, կեցության և սննդի ծախսերը։

Լրացուցիչ մանրամասներ

Հավելված 1_Անհատական նախագծերի մասին

Հավելված 2_Անհատական նախագծերի ներկայացման ձևանմուշ

*****

Ռազմավարական հաղորդակցության լաբորատորիայի մասին

Ռազմավարական հաղորդակցության լաբորատորիան նորարարական կրթական միջավայր է, որտեղ կարճ ժամանակահատվածում, վերապատրաստումների միջոցով մասնակիցներին տրվում է անհրաժեշտ հմտությունների, գիտելիքների և փորձի ձեռքբերման, կարողությունների զարգացման ու դրանց կիրառման հնարավորություն։

Ռազմավարական հաղորդակցության լաբորատորիան  հնարավորություն կտա ձեռք բերել ռազմավարական հաղորդակցության տեսական  և կիրառական գիտելիքներ, փորձառու մասնագետների օգնությամբ և խորհրդատվությամբ ծանոթանալ ռազմավարական հաղորդակցության մշակման, դրա իրականացման հմտություններին, ուսումնասիրել միջազգային և հայաստանյան լավագույն փորձը։ Լաբորատորիայի շրջանավարտները, այս բացառիկ հնարավորությունն արդյունավետ օգտագործելով, կդառնան պահանջված մասնագետներ՝ նոր որակի բարձրացնելով իրենց մասնագիտական հմտությունները։

Ծրագրի մասին 

Դասընթացն անցկացվում է «Արդարացի դատաիրավական բարեփոխումներ» ծրագրի շրջանակում, որն իրականացվում է Ժողովրդավարության զարգացման հիմնադրամի  առաջնորդությամբ ձևավորված Կոնսորցիումի կողմից, որի անդամներն են՝ Հանրային լրագրության ակումբը, Հելսինկյան քաղաքացիական ասամբլեայի Վանաձորի գրասենյակը և «Իրավունքների պաշտպանություն առանց սահմանների» ՀԿ-ն։