Մարդկային պատմություններ հեղինակելու լրագրողական հմտություններ․ վեբինար

Հանրային լրագրության ակումբը սիրով հրավիրում է Լեռնային Ղարաբաղի մեդիա համայնքի ներկայացուցիչներին մասնակցելու կարողությունների ու հմտությունների զարգացմանն ուղղված առցանց հանդիպմանը, որի ընթացքում կքննարկենք մարդկային պատմություններ պատմելու հմտություններն ու կանդրադառնանք դրանց առանձնահատկություններին։  Վեբինարն անցկացնելու է Շուշանիկ Փափազյանը, ով 44-օրյա պատերազմից ի վեր աշխատում է որպես հակամարտություն լուսաբանող լրագրող և մասնագիտացած է մարդկային պատմությունների ներկայացման մեջ։

Վեբինարը տեղի կունենա հոկտեմբերի 25-ին, ժամը 19։00-ին, Zoom հարթակում։ Վեբինարին մասնակցելու համար անհրաժեշտ է գրանցվել այստեղ։  

Վեբինարի ընթացքում կքննարկվեն հետևյալ թեմաները՝

• Արցախյան 44-օրյա պատերազմի և բռնի տեղահանության ընթացքում իրականացված լրագրողական աշխատանքների վերլուծություն․ լրագրողական էթիկայի հիմնական կանոններ։
• Պատերազմը վերապրածների հետ աշխատանքի մեթոդաբանություն․ լրագրողական նյութի հերոսների ընտրության չափանիշներ և հարցազրույցի մասնակիցների ընտրության սկզբունքներ։
• Խոշտանգումների ենթարկված անձանց հետ հարցազրույցի նախապատրաստում և  զոհված զինծառայողների հարազատների հետ զրույցի վարման էթիկական նրբություններ։
• Լրագրողական նյութի կառուցվածքի մշակում, մասնավորապես՝ առաջնային և երկրորդային տեղեկատվության տարանջատում և ներկայացում, մարդկային պատմության վրա կենտրոնացում։
• Մեդիա բովանդակություն ստեղծողների համար հոգեբանական աջակցության հնարավորություններ։ Հոգեբանական աջակցության մանրամասները ներկայացված են այստեղ։ 

Այս վեբինարը ձեզ կտրամադրի գործիքներ և հմտություններ ՝ համակարտության լուսաբանման ընթացքում չխախտելու լրագրության սկզբունքները։ Միացեք մեզ՝ ավելի զգայուն և պատասխանատու լրատվություն ապահովելու նպատակով։

Վեբինարը կազմակերպվում է «Պրոֆեսիոնալ մեդիան եւ քաղհասարակությունը միավորում են ուժերը՝ հանուն երկխոսության» ծրագրի շրջանակում, որն իրականացվում է Հանրային լրագրության ակումբի կողմից՝ Եվրոպական հանձնաժողովի ֆինանսավորմամբ։ Ծրագրի գործընկերն է International Alert-ը։