Նորություններ

Հետաքրքիր ժամանց՝ գումարած նոր գիտելիքներ․ Հանրային լրագրության ակումբը և Ժողովրդավարության զարգացմանը հիմնադրամը ներկայացնում են նոր արտադրանք՝ «Իրավունք» սեղանի ինտելեկտուալ խաղ։ Խաղի մշակումն իրականացվել է «Դը Գեյմ» ընկերության հետ։

Խաղը նախատեսված է ինչպես ապագա իրավաբանների, այնպես էլ իրավական ոլորտը լուսաբանող լրագրողների, մանկավարժների ու իրավական ոլորտով հետաքրքրվող քաղաքացիների համար։

«Բարդ թեմաները թեթև ու խաղաֆիկացված ձևաչափերով ներկայացնելու կարիք կա», -նշում է Հանրային լրագրության ակումբի ղեկավար Սեդա Մուրադյանը՝ հավելելով, որ խաղի միջոցով ստացած տեղեկությունն ու գիտելիքը ավելի լավ է հիշվում․

«Մենք համոզված ենք, որ այս խաղը կդառնա նույնքան պահանջված, որքան մեր «Մեդիագիտակը»»։

«Իր ինտերակտիվ ձևաչափով խաղն օգնում է ուսումնասիրել բարդ իրավական հայեցակարգեր և իրավիճակներ, ինչն էլ կխթանի արդարադատության մասին հետաքրքիր զրույցներ։ Արդարադատության ոլորտի բարեփոխումը ներառում է ավելին, քան համակարգի փոփոխությունները. այն նաև հանրային ընկալումների ձևավորումն է այն մասին, թե ինչ է արդարադատությունը: Խաղը կօգնի ձևավորել այդ ընկալումները և հանրությանը մասնակից կդարձնի բարեփոխման օրակարգին»,- ասում է Ժողովրդավարության զարգացման հիմնադրամի տնօրեն Նաիրա Սուլթանյանը։

«Իրավունք» խաղը կարելի է խաղալ թե՛ անհատական, թե՛ թիմային։ Այն բաղկացած է վեց բաժնից, որում ներկայացված են հետևյալ թեմաները՝ մարդու իրավունքներ, դատաիրավական համակարգ, օրենսդիր և գործադիր մարմիններ, ժողովրդավարական մոտեցումներ, կոռուպցիայի դեմ պայքար, մարդու իրավունքների տեղական և միջազգային մարմիններ ու կառույցներ։ Բացի այս, խաղում ներկայացված են դատավարական իրավիճակներ, որոնց ճիշտ վճիռները խաղացողները պետք է կռահեն։

«Իրավունք» սեղանի ինտելեկտուալ խաղը ստեղծվել է «Արդարացի դատաիրավական բարեփոխումներ» ծրագրի շրջանակում, որն իրականացվում է Ժողովրդավարության զարգացման հիմնադրամի առաջնորդությամբ ձևավորված կոնսորցիումի կողմից, որի անդամներն են՝ Հանրային լրագրության ակումբը, Հելսինկյան քաղաքացիական ասամբլեայի Վանաձորի գրասենյակը և «Իրավունքների պաշտպանություն առանց սահմանների» ՀԿ-ն։

Ծրագրի նպատակն է բարձրացնել հանրային իրազեկվածությունը արդարադատության ոլորտում ներկայում իրականացվող ինստիտուցիոնալ բարեփոխումների վերաբերյալ: Ծրագիրը ներառում է նաև գործողություններ, որոնք ուղղված են նշված խնդիրների վերաբերյալ քաղաքացիական հասարակության հաղորդակցության կարողությունների բարելավմանը։

Ի դեպ, «Իրավունք» սեղանի խաղը Հանրային լրագրության ակումբի միակ արտադրանքը չէ։ Մենք թողարկել ենք նաև մեծահասակների մեդիագրագիտությունը խթանող՝ «Մեդիագիտակ» խաղը։

Եթե Դուք ցանկանում եք ձեռք բերել խաղը, ապա կարող եք մասնակցել մայիսի 3-ին, ժամը 17։00-19։00-ին Երևանի «Իբիս» հյուրանոցում (Հյուսիսային պողոտա 5/1) կայանալիք շնորհանդեսին՝ լրացնելով սույն ձևաթուղթը։