Նորություններ

Հանրային լրագրության ակումբի (ՀԼԱ) նախագահ Սեդա Մուրադյանը Բրյուսելում ներկայացրել է ՀԼԱ-ի և Մեդիա նախաձեռնությունների կենտրոնի (ՄՆԿ) ստեղծած խաղերն ու այլ նյութեր՝ մեդիագրագիտության թեմայով։ Արևելյան գործընկերության և Կենտրոնական Ասիայի քաղաքացիական հասարակությունների համար կազմակերպված աշխատաժողովին, մասնավորապես, ներկայացվել է «Մեդիագիտակ» խաղը, որը միտված է խթանելու մեծահասակների մեդիագրագիտության և քննադատական մտածողության զարգացումը։ Չորս հետաքրքիր և ինտելեկտուալ առաջադրանքներից բաղկացած խաղը նպաստում է մեդիագրագիտության վերաբերյալ հմտությունների ձևավորմանը։

Աշխատաժողովի շրջանակում ներկայացվել է նաև մեծահասակների մեդիագրագիտության հզորացմանն ուղղված խաչբառը, որը ծանոթացնում  է մեդիաաշխարհի բառամթերքին։

Այս կրթական նյութերը ստեղծվել են «Մեծահասակների հզորացում մեդիագրագիտությամբ» ծրագրի շրջանակում, որն իրականացրել են Դի-Վի-Վի Ինթերնեյշնալի հայաստանյան գրասենյակը և Հանրային լրագրության ակումբը՝ Գերմանիայի արտաքին գործերի նախարարության աջակցությամբ։

ՀԼԱ նախագահն աշխատաժողովի մասնակիցներին է ներկայացրել նաև ամերիկյան բեսթսելլեր «Կըտ-կըտ ճուտիկը», «Թվային պոչ» և «Լինում է, չի լինում առցանց» հեքիաթների հայերեն տարբերակները, որոնք զվարճալի պատմություններ են՝ օգնելու փոքրիկներին դառնալ մեդիագրագետ և լինել անվտանգ առցանց միջավայրում։

Գրքերը հրատարակվել են «Ավելի անվտանգ առցանց միջավայր․ նախադպրոցական հաստատություններում մեդիագրագիտության ուղղությամբ միջամտություն» ծրագրի շրջանակում, որը Հանրային լրագրության ակումբն իրականացրել է ՀՀ-ում ԱՄՆ դեսպանատան աջակցությամբ։ Հեքիաթները միտված են քննադատական մտածողության և մեդիագրագիտության զարգացմանը՝ նախադպրոցական հաստատություններում դաստիարակների վերապատրաստումների, օգտակար գրականության հրատարակման և տարատեսակ դասընթացների կազմակերպման միջոցով։

Աշխատաժողովի մասնակիցները հնարավորություն են ունեցել նաև ծանոթանալ ՄՆԿ-ի «Լիտերատուսի արկածները» սեղանի խաղին, որով կարելի է պարզել խաղացողի մեդիագրագիտության մակարդակը, կեղծ ու շփոթեցնող տեղեկությունների հոսքերում կողմնորոշվելու ունակությունները։

Նշենք, որ Բրյուսելում անցկացվող աշխատաժողովը նվիրված էր ապատեղեկատվության դեմ պայքարին։