Հայտարարություններ

Փաստերի ստուգման և մեդիագրագիտության լուծումներ՝ տեխնոլոգիաների միջոցով

Լրացնել մասնակցության առցանց հայտը։

Հանրային լրագրության ակումբը, Հայաստանում ԱՄՆ դեսպանատան աջակցությամբ իրականացվող «Մեդիա և տեղեկատվական գրագիտության աքսելերատոր» ծրագրի շրջանակում, «Ինովացիոն լուծումների և տեխնոլոգիաների կենտրոն» հիմնադրամի հետ համատեղ հայտարարում է «Մեդիա և տեղեկատվական գրագիտության Հեքըթոն 2022» մրցույթ՝ փաստերի ստուգման և մեդիագրագիտության կարողությունների զարգացմանն ուղղված տեխնոլոգիական լուծումներով նախագծերի համար։

Մեդիա և տեղեկատվական գրագիտության Հեքըթոնը տեղի է ունենալու ս․թ․ դեկտեմբերի 3-ին և 4-ին՝ «Ինովացիոն լուծումների և տեխնոլոգիաների կենտրոն»-ում (հասցե՝ ք․Երևան, Ալեք Մանուկյան 1/7, Երևանի պետական համալսարան)։

Այս նորարար նախաձեռնությանը միացել են մեր գործընկեր կառույցները՝ Մեդիա նախաձեռնությունների կենտրոնը, Հայաստանում Ամերիկյան խորհուրդները, Ձեռնարկությունների ինկուբատոր հիմնադրամն իր կողմից իրականացվող և ԱՄՆ ՄԶԳ-ի կողմից ֆինանսավորվող Հայաստանում աշխատուժի զարգացման ծրագրով, Գյումրու տեխնոլոգիական կենտրոնը, Վանաձորի տեխնոլոգիական կենտրոնը, Հայաստանի կայուն զարգացման նպատակների ազգային նորարարական կենտրոնը , ՀՀ վարչապետի աշխատակազմի «Հանրային կապերի և տեղեկատվության կենտրոն» ՊՈԱԿ-ը:

Հեքըթոնն հայտարարվում է Մեդիագրագիտության հայաստանյան շաբաթվա շրջանակում (նոյեմբեր 7-13, 2022), որ ամեն տարի կազմակերպվում է Մեդիա նախաձեռնությունների կենտրոնի և ՀՀ կրթության, գիտության, մշակույթի և սպորտի նախարարության կողմից։

Նպատակը․ Հեքըթոնի նպատակն է համախմբել Հայաստանի տեղեկատվական և հաղորդակցության տեխնոլոգիաների, մեդիա, կրթության ոլորտները և համատեղ ուժերով մշակել տեխնոլոգիական լուծումներ, որոնք կնպաստեն հանրության լայն շրջանակների, մեդիա համայնքի և կրթության ոլորտի մեդիագրագիտությանը, կաջակցեն փաստերի ստուգմանն ու տեղեկությունների ճշգրտմանը։

Մասնակիցները․ Հեքըթոնին մասնակցելու են սթարթափ թիմեր, ՏՀՏ ոլորտի ընկերություններ, մեդիա և կրթության ոլորտների ներկայացուցիչներ, լրագրողներ։ Հայտեր կարող են ներկայացնել ինչպես թիմեր, այնպես էլ անհատներ։

Հեքըթոնը․ Հեքըթոնը տևելու է 24 ժամ, որի ընթացքում անցկացվելու են փաստերի ստուգման և մեդիագրագիտության վերաբերյալ դասընթացներ տեղական և միջազգային առաջատար փորձագետների կողմից, մասնակիցները մշակելու են տեխնոլոգիական գաղափարներ, որոնց դեմո տարբերակները ներկայացվելու են Հեքըթոնի մրցատյանի գնահատականին։

Հեքըթոնի մրցանակային ֆոնդը կազմում է 15,000 ԱՄՆ դոլարին համարժեք ՀՀ դրամ, որը շնորհվելու է երեք լավագույն գաղափարների հեղինակներին։

Դեմո մակարդակը մշակելու, զարգացնելու և կյանքի կոչելու համար Հեքըթոնի ընթացքում և դրանից հետո տեխնոլոգիական, մեդիա, փաստերի ստուգման, կրթության և լրագրության ոլորտի լավագույն մասնագետները մենթորական աջակցություն են ցուցաբերելու գաղափարների շուրջ աշխատող թիմերին և տրամադրելու են խորհրդատվություններ, որոնք կնպաստեն առավել կարիքահեն և առաջատար լուծում ստանալու գործընթացին։

Հեքըթոնի վերաբերյալ կազմակերպվել է 2 տեղեկատվական հանդիպում, որտեղ Հեքըթոնի դիմորդների և հետաքրքված անձանց հետ քննարկվել են դիմելու մանրամասները։

Հեքըթոնի ընթացքում մշակվող տեխնոլոգիական լուծումները պետք է հաշվի առնեն ՀԼԱ-ի աջակցությամբ և Մեդիա նախաձեռնությունների կենտրոնի կողմից իրականացված հետազոտության արդյունքները, որոնք բացահայտում են ապատեղեկատվության հետ աշխատանքի և տեղեկությունների ստուգման հարցերում մեդիա աշխատողների կարիքները։ Հեքըթոնի ընթացքում կազմակերպիչները կհոգան մասնակիցների սննդի ծախսերը։

Հետհեքըթոն․ Հետհեքըթոնային շրջանում (2-3 ամիս) մրցանակ շահած թիմերը ստանալու են մենթորական աջակցություն։ Հետհեքըթոնային շրջանում մշակված գաղափարների ուղղությամբ հաղթող թիմերն աշխատելու են շուրջ երկու ամիս և զարգացնելու են դրանք ներդրողների, միջազգային դոնոր կազմակերպությունների, ՏՀՏ և մեդիա ոլորտի ներկայացուցիչների մասնակցությամբ առանձին միջոցառման ընթացքում ներկայացնելու համար։

Դիմումներ․ Եթե հետաքրքրված եք այս հնարավորությամբ և ցանկանում ենք անհատապես կամ թիմային մասնակցություն ունենալ Հեքըթոնին, մշակել տեխնոլոգիական լուծումներով նորարար գաղափարներ, այնուհետև մենթորական աջակցությամբ զարգացնել դրանք՝ ներկայացնելով մրցատյանին և հնարավոր ներդրողներին, ապա մինչև ս․թ. նոյեմբերի 28-ը լրացեք այս հայտը։

Հայտերը դիտարկվելու են ՀԼԱ և ԻԼՏԿ ներկայացուցիչների կողմից, որից հետո ընտրված մասնակիցները և թիմերը կծանուցվեն մանրամասների և հետագա քայլերի վերաբերյալ։ Հայտի լրացման գործընթացի կամ Հեքըթոնի վերաբերյալ հարցերի դեպքում կարող եք կապվել ՀԼԱ ծրագրերի ղեկավար Ալեքսանդր Մարտիրոսյանի հետ՝ [email protected] էլեկտրոնային փոստի միջոցով։

Ծրագիրը․ Հեքըթոնն անցկացվում է «Մեդիա և տեղեկատվական գրագիտության աքսելերատոր» ծրագրի շրջանակում, որն իրականացվում է Հանրային լրագրության ակումբի կողմից՝ ԱՄՆ պետքարտուղարության Հանրային դիվանագիտության գրասենյակի դրամաշնորհի շրջանակում։ Ծրագրի նպատակն է նպաստել Հայաստանում ապատեղեկատվությանը դիմացկուն հասարակության ստեղծմանը՝ քաղհասարակության, մեդիայի կարողությունների զարգացման, հանրային, մասնավոր և պետական ոլորտների միջև կայուն համագործակցության միջոցով, ինչպես նաև տեղեկատվական տեխնոլոգիաների կիրառմամբ։ Ծրագրի մանրամասները հասանելի են այստեղ։