Freedom House-ի զեկույցում Հայաստանը դասվել է ազատ երկրների շարքում
- October 28, 2015
- Category: Նորություններ
Freedom House-ի կողմից հրապարակված «Համացանցի ազատությունը 2015-ին» զեկույցում Հայաստանը դասվել է ազատ երկրների շարքում:
Զեկույցը հրապարակվել է այսօր: Զեկույցի պատրաստմանը Հայաստանից մասնակցել է Հանրային լրագրության ակումբի նախագահ Սեդա Մուրադյանը տեղեկատվական անվտանգության փորձագետ Սամվել Մարտիրոսյանի հետ համագործակցությամբ:
88 երկրների շարքում Հայաստանը զբաղեցրել է 28-րդ հորիզոնականը՝ համարվելով ինտերնետի առումով ազատ երկիր: Հարևան Վրաստանը ևս ազատ երկրների թվում է՝ զբաղեցնելով 24-րդ հորիզոնականը: Մասնակի ազատ երկրների շարքում են հարևաններ Ադրբեջանը (56-րդ հորիզոնական) և Թուրքիան (58-րդ հորիզոնական): Իրանը 87-րդ հորիզոնականում է՝ որպես անազատ համացանց ունեցող երկիր:
Զեկույցում նշվում է, որ Հայաստանում համացանցի հասանելիությունը վերջին մի քանի տարիների ընթացքում շարունակաբար բարելավվում է, դրական փոփոխություններ են գրանցվում նաև համացանցային ենթակառուցվածքներում և համեմատաբար սակավաթիվ են առցանց բովանդակության նկատմամբ սահմանափակումները: Բացի այդ, քաղաքացիական խմբերն ու հասարակական կազմակերպություններն առցանց հաղորդակցման գործիքները կիրառում են տարածելու և կազմակերպելու տարբեր նախաձեռնություններ՝ քաղաքացիական հասարակությունը մոբիլիզացնելու նպատակով: Հետազոտության հեղինակները նշում են, որ 2014 թվականի հունվարից որևէ բողոք չի եղել կառավարության կողմից համացանցային հասանելիության սահմանափակման կամ անջատումների վերաբերյալ:
