Մեդիա բովանդակություն ստեղծողների հոգեկան առողջության ապահովման և զարգացման կարևորությունը․համաժողով

Համաժողովն անցկացվում է «Ինտերնյուսը Հայաստանում» միջազգային կազմակերպության կողմից իրականացվող Հայաստանի մեդիայի զարգացման ծրագրի շրջանակում, որը ֆինանսավորվում է ԱՄՆ Միջազգային զարգացման գործակալության կողմից։

Համաժողովին ներկա են լինելու լրատվամիջոցների, հասարակական, միջազգային կազմակերպությունների, դեսպանատների ներկայացուցիչներ, ոլորտային փորձագետներ։

«Հոգեբանների հայկական գիտական միավորում» ՀԿ-ն, «Հանրային լրագրության ակումբ» ՀԿ-ի պատվերով, իրականացրել է ուսումնասիրություն՝ արտակարգ իրավիճակներ լուսաբանող հայաստանյան մեդիա բովանդակություն ստեղծողների սոցիալ-հոգեբանական կարիքների շուրջ։ Ուսումնասիրությունն անցկացվել է ՀԼԱ-ի «Հոգեբանական աջակցություն՝ Հայաստանի մեդիայի աշխատակիցներին» նախագծի շրջանակում։

Համաժողովի ընթացքում կներկայացվեն ուսումնասիրության տվյալները և կքննարկվեն ձևակերպված որոշ քայլերի հնարավոր իրականացման հեռանկարները, մասնավորապես՝ լրատվամիջոցների և մեդիա համայնքի տեսակետից։ Այս տվյալներն ու քայլերը վերաբերում են մեդիա բովանդակություն ստեղծողների հոգեկան առողջության պահպանման և բարելավման խնդիրներին։

Համաժողովի ընթացքում կներկայացվի և կքննարկվի նաև մեդիայի աշխատակիցների սոցիալ-հոգեբանական բարեկեցությանն ուղղված ներքին կանոնակարգի նախնական տարբերակը, կհավաքագրվեն առաջարկություններ՝ այն լրամշակելու համար։

Համաժողովը քննարկման և մտքերի փոխանակման հնարավորություն է, որը համոզված ենք՝ կօգնի ամբողջացնելու և համապարփակ ու իրատեսական մակարդակում ամփոփելու ստացված տվյալներն ու հնչած առաջարկները, ինչպես նաև պատկերացնելու և նախանշելու հետագա քայլերը։

Մասնակցությունը՝ միայն հրավերով։