#PowerUp-ն ամփոփեց 2-րդ փուլը
- Ապրիլի 20, 2021
- Բաժին. Նորություններ
Մեդիագրագիտությունը և քննադատական մտածողությունն օգնում են մեզ կողմնորոշվել տեղեկատվական հոսքերում, տարանջատել թացը չորից, վերլուծել բովանդակությունն ու չենթարկվել մանիպուլյացիաների։
Այս ամենն ավելի հեշտ է անել, երբ կողքիդ կանգնած են ոլորտի լավագույն մասնագետները և տարիքակից ընկերներդ՝ Հայաստանի տարբեր մարզերից։
Ապրիլի 17-ից 18-ը Ծաղկաձորում տեղի ունեցավ #PowerUp-ի երկօրյա դասընթացի երկրորդ փուլը մեդիագրագիտության, քննադատական մտածողության և փաստերի ստուգման թեմաներով։
Դասընթացին մասնակցեցին Շիրակի, Լոռու և Արմավիրի 15 երիտասարդենր և մարզային 3 համակարգողները։
Դասընթացի փորձագետների հետ մասնակիցներն ուսումնասիրեցին մեր օրերի ամենաարդիական թեմաները՝
Դիանա Եղիազարյան, երիտասարդական աշխատող, Երիտասարդական ակումբների դաշնություն (ԵԱԴ)։
Թեմա՝ Ինչպե՞ս չդադարել սովորել, համախմբել համայնքը ապատեղեկատվության դեմ պայքարի շուրջ։
Վահե Սարուխանյան, փաստերի ստուգման մասնագետ, Հետք մեդիա գործարան։
Թեմա՝ Ապատեղեկատվության, մտածված ու կանխամտածված դեզինֆորմացիայի պատմությունն ու նպատակները. հստակ պատմական ու ժամանակակից քեյսերի մասին ամփոփում։
Անահիտ Հակոբյան, լրագրող։
Թեմա՝ Մեդիագրագիտությունը TikTok-ի դարում
Հարություն Ծատրյան, փաստերի ստուգման մասնագետ, Մեդիա նախաձեռնությունների կենտրոն։
Թեմաներ՝ Փաստերի ստուգումն ու տեղեկությունների ճշգրտումը թվային միջավայրում։ Տեքստի, լուսանկարի և տեսանյութի ստուգում։ Խորացված որոնում, աղբյուրների ստուգում և ջնջված նյութերի հայտնաբերում։
Շուշան Դոյդոյան, ԵՊՀ դասախոս, Ինֆորմացիայի ազատության կենտրոնի ղեկավար։
Թեմաներ՝ Տեղեկատվության ազատության օրենքի և պրակտիկայի պարզաբանում։ Պաշտոնական հարցումներ։
Լրագրողական էթիկայի կանոններ։ Էթիկան կոնֆլիկտների և հակամարտությունների ժամանակ։
Աձննական տվյալների պաշտպանության կարևորությունը պատերազմական իրավիճակներում։
Ռուզաննա Թանթուշյան, հաղորդակցության մասնագետ, լրագրող, ԱՄՆ, Նյու-Յորք։
Թեմա՝ Ապատեղեկատվության ԱՄՆ փորձի ներկայացում։
Դասընթացի մասնակիցներին հնարավորություն է տրվելու առաջարկել սեփական համայնքում փաստերի ստուգման գաղափարներ և իրականացնել այն՝ ՀԼԱ կողմից կցվող մենթորի՝ փաստերի ստուգման մասնագետների աջակցությամբ։
Հետագայում, երիտասարդների կողմից պատրաստած փաստերի ստուգման նյութերին անդրադարձ կլինի #PowerUp նախագծի շրջանակներում արտադրվող «Ինֆոդեմիա» հաղորդումների շարքում։ Պատրաստելով փաստերի ստուգման նյութեր, երիտասարդները կստանան նաև հոնորարներ։
Իսկ #PowerUp-ն առաջ է գնում՝ հավաքագրելով նոր երիտասարդների և ընդլայնելով համախոհների ցանցը։ Շուտով կհայտարարվեն #PowerUp 3-րդ փուլի հայտերի ընդունման մեկնարկը։
