Երևանում կանցկացվի ապատեղեկատվության և քարոզչության դեմ պայքարին նվիրված միջազգային համաժողով
- Ապրիլի 20, 2023
- Բաժին. Հայտարարություններ
Հանրային լրագրության ակումբը (ՀԼԱ), կարևորելով Հայաստանում ապատեղեկատվության դեմ պայքարը և մեդիագրագիտության զարգացումը, նախատեսում է ս․թ․ մայիսի 4-ին Երևանում անցկացնել միջազգային համաժողով։
«Պայքար ապատեղեկատվության և քարոզչության դեմ․ երկխոսություն դրանց դիմակայության ռազմավարությունների շուրջ Հայաստանում և դրա սահմաններից դուրս» խորագրով համաժողովը կազմակերպվում է ՀԼԱ «Մեդիա և տեղեկատվական գրագիտության աքսելերատոր» ծրագրի շրջանակում, որն իրականացվում է ԱՄՆ պետքարտուղարության Հանրային դիվանագիտության գրասենյակի ֆինանսական աջակցությամբ։
Այս միջոցառումը նախաձեռնել է Հանրային լրագրության ակումբը, որը կազմակերպվում է ՀՀ վարչապետի աշխատակազմի «Հանրային կապերի և տեղեկատվության կենտրոն» ՊՈԱԿ-ի և Մեդիա նախաձեռնությունների կենտրոնի հետ համագործակցությամբ։
Համաժողովի նպատակն է երկխոսություն ծավալել միջազգային և հայաստանյան հեղինակավոր փորձագետների, ոլորտային մասնագետների, քաղաքական գործիչների, լրատվամիջոցների և քաղաքացիական հասարակության ներկայացուցիչների միջև՝ քննարկելու ապատեղեկատվության մարտահրավերները, քարոզչական ժամանակակից մեթոդներն ու նոր տեխնոլոգիաների ազդեցությունը մանիպուլյացիաների ու քարոզչության սփռման գործում։ Համաժողովին անդրադարձ կկատարվի 2020 թվականից հետո քաղված դասերին, ավտոմատացված քարոզչությանը և թվային ապատեղեկատվության զարգացած գործիքակազմին ու դրանց դեմ պայքարի արդյունավետ միջոցներին։ Համաժողովը նաև հնարավորություն կտա փոխանակել ամերիկյան և հայկական փորձագիտական համայնքների փորձը կեղծ լուրերին և ապատեղեկատվությանը հակազդելու գործում և կխթանի այդ համայնքների միջև ավելի ամուր կապերի ստեղծմանը։
Համաժողովի հիմնական թիրախային լսարանը հայաստանյան մեդիայի և ՔՀԿ-ների ներկայացուցիչներն են, քաղաքական գործիչներ, տարբեր համալսարանների Լրագրության ֆակուլտետների ուսանողներ և ոլորտի այլ ներկայացուցիչներ։
Համաժողովն արժեքավոր հարթակ կդառնա գիտելիքների, փորձի և ռազմավարությունների փոխանակման համար՝ պայքարելու ապատեղեկատվության մարտահրավերների դեմ և ձևավորելու դիմակայուն հասարակություն Հայաստանում և դրա սահմաններից դուրս։
Համաժողովի աշխատանքային լեզուներն են հայերենը և անգլերենը՝ համաժամանակյա թարգմանությամբ։
Համաժողովի մասնակցությունը հրավերով է։ Լրագրողների համար մուտքն ազատ է։
