Նորություններ

Հանրային լրագրության ակումբը հրապարակում է նոր կորոնավիրուսի և արտակարգ դրության վերաբերյալ՝ վիզուալ և տեքստային բովանդակությամբ հարուստ կայքը, որը ստեղծվել է «Կովիդ-19 արագ արձագանքում» ծրագրի շրջանակներում:

Ծրագիրը նպատակաուղղված է խթանելու հանրության իրազեկվածության մակարդակի բարձրացմանը կորոնավիրուսի և դրանով պայմանավորված նոր իրավիճակի վերաբերյալ։ Այն թիրախավորում է հանրային առողջությունը, սոցիալական պատասխանատվությունը, մարդու իրավունքները, քաղաքացիական պատասխանատվությունը, պետության և հանրության միջև համագործակցությունը և այլն։  Ծրագրի շրջանակներում ստեղծվել է covid.pjc.am որտեղ ներկայացված են ծրագրի շրջանակներում ստեղծված արտադրանքները:

Կայքը բաղկացած է մի քանի բաղադրիչներից.

• Քրոնիկոն – այստեղ դուք կարող եք տեսնել Հայաստանում նոր կորոնավիրուսի տարածման առաջին օրվանից հրապարկված կարևոր նորություններն ու հայտարարությունները, ինչպես պաշտոնական անձանց և հանրային դեմքերի կողմից, այնպես էլ արժանահավատ և փաստարկված այլ աղբյուրներից։ Ըստ օրերի ներկայացված են նաև արտակարգ դրությամբ պայմանավորված որոշումները, ամենօրյա վիճակագրությունները և հանրային ելույթները։
• Ֆոտոցուցահանդես – այս բաժնում ժամանակագրական հաջորդականությամբ ներկայացված են Հայաստանում արտակարգ դրության օրերը: Ֆոտոցուցահանդեսում տեղ են գտել նաև առանձնահատուկ և տարբերվող դեպքերը, կառավարության որոշումները, որոնք արտահայտված են վիզուալ կերպով:
• Ոլորտներ (ֆիլմարտադրություն) – Փաստագրական ֆիլմի ստեղծման գործընթացում ՀԼԱ-ն իրականացրել է հարցազրույցներ, հետազոտություններ և ուսումնասիրություններ առողջապահության, կրթության և սոցիալական վիճակի վերաբերյալ, որոնք կայքում ներկայացված են ըստ ոլորտների։ Շեշտը դրվել է ոլորտի փորձագետների և շահառուների կարծիքի և դիրքորոշման արտահայտման, փաստացի իրավիճակի նկարագրության և սեփական փորձի ներկայացման վրա։ Ֆիլմերը բազմակողմանիորեն արտացոլում են իրականությունը և ներկայացնում են կառավարության արձագանքը ճգնաժամային իրավիճակի վերաբերյալ: Այս բաժինը թարմացման փուլում է։
• Գլխավոր էջ – այստեղ ներկայացված են ծրագրի շրջանակներում ստեղծված արտադրանքների վերաբերյալ կարճ տեղեկություններ: ՀԼԱ-ն մշակել է հանրային իրազեկումն ապահովելու մի քանի եղանակներ։ Կայքում հրապարակվել են մեդիա արտադրանքի մի քանի տեսակներ՝ վեբինարներ, քննարկումներ, պաստառներ, սոցիալական մեդիա մարտահրավերներ։

Կայքում արտացոլված է նաև «Հայաստանի ազդարարման ալիք» չաթբոտ ծառայությունը: Ծառայության նպատակն է նպաստել հանրային իրազեկվածությանը և մատչելի ու պարզ միջոցով բնակչության տեղեկացվածության մակարդակի բարձրացմանը։  Այս ծառայությունը բացառիկ է և՛ իր տեսակով, և՛գործընկերության մակարդակով։ Հասարակական կազմակերպության, հայաստանյան և միջազգային ՏՏ ընկերությունների ուժերի և ռեսուրսների մեկտեղման արդյունքում ստեղծվել է նորարարության կիրառմամբ այնպիսի ծառայություն, որը կիրառելի կարող է լինել ցանկացած արտակարգ իրավիճակում (Facebook – ֆեյսբուքյան էջ, Messenger – չաթբոտ մեսենջեր, Telegram – Տելեգրամ ալիք):

Հանրային իրազեկման բաղադրիչում անմասն չեն մնացել սոցիալական գովազդները, որոնք նկարահանվել են ՀԼԱ-ի կողմից։ Սոցիալական գովազդների ստեղծման գործընթացին մասնակցել են բազմաթիվ դերսաններ, երգիչներ, իրավապաշտպաններ, բժիշկներ, երեխաներ և ՀՀ քաղաքացիներ՝ դրանով այն մատչելի և հասանելի դարձնելով հանրության բոլոր խմբերի համար։

• Հետազոտություն – Հանրային լրագրության ակումբի պատվիրակմամբ իրականացվել է հետազոտություն՝ արտակարգ դրության ժամանակահատվածում ԶԼՄ-ներին վերաբերող օրենսդրական փոփոխությունների վերաբերյալ, թե ինչպես կառավարությունների կողմից սահմանափակվեց մեդիայի գործունեությունը Հայաստանում և մի շարք այլ երկրներում՝ լրագրողների, ԶԼՄ-ների համար բարդ և հաճախ անհասկանալի դրություն ստեղծելով։ Բացի այդ, այս բաժնում ներկայացված են նաև ԲՀՀ Հայաստանի աջակցությամբ իրականացված այլ հետազոտություններ:

_________________

Սույն ծրագիրն իրականացվում է Հանրային լրագրության ակումբի կողմից՝ Բաց հասարակության հիմնադրամներ – Հայաստանի աջակցությամբ:

Ծրագրի արտադրանքներում և հրապարակվող կայքում արտահայտված տեսակետները կարող են չհամընկնել ԲՀՀ – Հայաստանի դիրքորոշման հետ: